Manis Manesin

Biasa kakanténané ené, wiréh jani pada ngoyong majohan, ngenem bulan acepok mara maan matemu, magenduwirasa. Apabuin Ketut Gingsir, diastun suba pénsiun ngelah kesibukan ngempu cucu ané mara matuuh plekutus bulan. Negakin sepéda motor, neked malun umahné, uli témbok panyengkerné suba ngenah Wayan Gubang negak, ngantiang sambil maca koran di ambén térasné.

“Beli Wayan, Om Swastyastu,” sapan Ketut Gingsir.

 

“Éh, Tut, Om Swastyastu, mai menékan!” wales Wayan Gubang sada kahkah-kéhkéh makokohan.

“Kénkén beli, uli pidan beli ngélkél makokohan kéné?” takon Ketut Gingsir.

“Uling banén Galungan suba masa kolongané tuh buina kenyat,” sautné adéng-adéng

“Mirib lebihan naar tapé sing, beli?” buin nyesed Ketut Gingsir.

“Kéto mirib, ééhh… éh....”  munyinné Wayan Gubang banban sada kimud.

Mara ngorahang kéto, Wayan Gubang inget dugas sugihanné, kurenanné meli tapé anggona ngejot tekén nyama-nyama muslimé ané paak ditu. Kadong jaan, seka bedik Wayan Gubang nyéndok tapé, misi jaja uli mawarna putih-barak, lantas kerébésina kacang kapri, jeg nyak mantep asanné, sing makita suud. Kuda kénkéné misi kinyam-kinyam nyobak krupuk meninjo ané kriak-kriuk renyah masi énak! Ento ngawinang kolonganné jeg cekeng, kering sing nyidayang mamunyi keras. Yén suba lakar mamunyi jag krek-krek misi cekah-cekoh. “Bes liu naar ané manis-manis sinah basang dadi kebus, kolongan panes, munyi serak, pokokné ané manis pasti lakar manesin,” kéto Wayan Gubang mamarma sada elek didian di kenehné.

“Kénkén jadi cenik-ceniké beli?” Ketut Gingsir ngesibyang Wayan Gubang ané sedeng nglamun.

“Enu cai agetan Tut, panak beliné makadadua ondén ada anak ngugu, mirib lakar dadi truna tua!” selsel Wayan Gubang nyautin patakon Ketut Gingsir.

“Tusing kéto beli, laan inget-ingetang té déwéké, mula tusing dadi sesai mengeluh, wiréh jodoh, rejeki koné suba ada ané ngatur.”

“Mula kéto saja, kéwala suba kepala tiga umurné, makadadua tondén masih ngelah keneh makurenan,” abetné Wayan Gubang.

“Sujatiné, beli bersyukur wiréh cening beliné makadadua suba maan tongos magaé ané melah di pemeréntahan, mirib enu lakar nincapang karier, tondén ngitungang berkeluarga.”

“Kéto suba ja kéto, beli ajak mboké suba sayan tua, apang ada ané ngrunguang mani puan.”

“Nah laan astitiang, sabar beli ajak mboké, dumadak suud Pemiluné ené nyen maan tunangan terus ngantén, laut ngelah cucu, ha… ha… sing kéto?”

Makadadua iteh matutur-tuturan, suud nyambat keluarga, ngorahang gegaén tur geginan anaké pénsiun, misi mahbahang indik cuaca ané nyansan panes lan ané sios-siosan. Wayan Gubang mula matimpal leket ajak Ketut Gingsir. Ajaka dadua maan nyéwa umah bareng, sesubanné pada tamat, Ketut Gingsir maan amongan dadi guru SMKN Sukawati, jani suba mayusa nem dasa tiban mara tahuné ené pénsiun. Wayan Gubang maan posisi dadi dosén di Kopertis, buin limang tiban lakar purnabhakti. Ipidan dugas pada-pada mahasiswa maan kos di Panjer, ngontrak akamar ajaka dadua, wiréh paturu tusing ngelah keluarga di Dénpasar. Jani sasukat suba pada dadi pegawé negeri, nyidayang pada meli karang paumahan anggona ngaé rompok-minimalis. Wayan Gubang nongos di Suwung Kangin, Ketut Gingsir ngoyong di Batubulan. Sabilang Umanis Galungan, diastun suba ada HP, enu masih saling delokin, apang maan ngorta makangin-makauh pada ngisinin rasa kangen.

“Nah, dumadak té kéto,” Ketut Gingsir nyelag. “Apabuin sasihé jani kalima, bulan Novémberé ené liu anaké nuju grahasta.”

“Kénkén Tut ada anak ngundang? Beli suba maan undangan adat di désa dadua, kartu resépsi di hotél abesik,” Wayan Gubang nyarita.

“Ada! Nah…., angayubagia jani suba nyansan nincap kramané ané nglaksanayang yadnya, pawiwahan apa luiré, apang makejang té sadya rahayu,” acep Ketut Gingsir.

“Mula kéto panglungsur sang nagun karya, ngundang ento suksmanné apang ajak liunan ngrastitiyang, mangda prasida mamargi antar, labdha karya sidaning don, tur mapangapti nunas upasaksi, sing kéto?” Wayan Gubang maseseken cara sulinggihé madarma wacana.

“Beneh ento beli,” Ketut Gingsir mrasa cumpu. “Sajroning yadnya, apang ada saksi-saksi, silih tuggil manusa saksi ané kacihnayang olih para undangan.”

Nyansan sanja, satuané sayan luget. Mara tingalina jaum jamné suba maakang ka angka lima, inget Ketut Gingsir tekén mantuné ané dadi perawat, lakar masuk jaga-malam. Ketut Gingsir énggal nagih magingsir budal. I Putu pianakné lakar ngatehang mantunné ka rumah sakit magaé. Apang ada ajaka kurenanné ngempu, Ketut Gingsir bangun lakar ngorahang mulih. 

“Beli, kanggoang ja, neked dini pacekang kayonané, punggelang satuané malu, buin mani-puan ajaka lanturang, enu liu ada lemah anggo tongos   makunyit di alas-matemu, jani duaning kabanda antuk galah, mirib suba pasemayan sanghyang waktu, legaang Beli iang lakar pamit,” idih Ketut Gingsir.

“Nah suba ya kéto, suksma Tut,” saur Wayan Gubang.

Wayan Gubang ngateh neked di angkul-angkul umahné, tolah-tolih majalan, saha nlektekang ka margané ané bek ada baliho, gambar cagub, cabup ada magedénan, ada macenikan ukuranné. Ketut Gingsir buin marérén masandekan, ajaka nutur nuturang indik para cagub, cabup di Pemiluné ené. 

“Pilkada serentaké…  kénkén Tut?” kisi-kisi Wayan Gubang.

“Béh, selantang pajalané uli Batubulan ka Suwung, bek nepukin gambar, spanduk wiadin baliho,” kéto abetné Ketut Gingsir nyawis patakonné Wayan Gubang.

Sambilanga bengong ajaka dadua ningalin spanduk wiadin foto cagub, cabup mawarna ané paglayut di punyan kayu lan sisin jalané, Ketut Gingsir makeneh-keneh, “Yén suba lakar Pemilu, nak mula kéto, apabuin masan kampanye cara janiné. Foto-foto cagub, cabup – ulian teknologi – bisa ngenah bagus genjing, jegég moleh buina makejang pada makenyem, nyakupang lima, mohon doa restu lan dukungan. Ada foto ané makumis jempé, ada sing maudeng ngenah sirahné lengar, ada nganggo udeng jénggér maselet keris, tur sing kuangan ané polos biasa-biasa. Nak mula ajak liu, ada kéné demenné ada kéto kenehné. Makejang ngelah tetujon gumanti nudut kayun kramané apang mamilih.  

“Inget Tut, eda dadi Golput nyen!” teges Wayan Gubang ngingetin Ketut Gingsir ané enu grapa-grépé nyeluk kantong ngalih-ngalihin kunci Honda Vario-né.

“Iang pasti, … inget ke TPS, lakar nagih janji caleg dugas kampanye. Apang tusing omonganné doén manis, laut mapi-mapi engsap yén suba kapilih. Dumadak té satya wacana, apang tusing kasambat munyi manis-manesin,” kedék ngrikik Ketut Gingsir majalan maakin sepéda motorné. 7